အကြမ်းဖက်စစ်အုပ်စုက အတုအယောင် ရွေးကောက်ပွဲဖြင့် တိုင်းပြည်အာဏာကို ဆက်လက်ထိန်းချုပ်ရန် ကြိုးပမ်းနေကာ ပြည်တွင်းစစ်မီး ပိုမိုရှည်ကြာစေမည်ဖြစ်ပြီး ငြိမ်းချမ်းရေးနှင့် ပိုအလှမ်းဝေးစေရန် ဦးတည်နေကြောင်း ပြည်ထောင်စုလွှတ်တော် ကိုယ်စားပြုကော်မတီ (CRPH) က ဖေဖော်ဝါရီ ၆ ရက်တွင် ထုတ်ပြန်လိုက်သည်။
အဆိုပါနေ့တွင် ပြုလုပ်သည့် ပြည်ထောင်စုလွှတ်တော် သတ္တမအကြိမ် အစည်းအဝေး ဒုတိယနေ့တွင် အတည်ပြုထုတ်ပြန်ခြင်းဖြစ်ကာ အကြမ်းဖက်အဖွဲ့အစည်းဖြစ်သည့် စစ်အုပ်စု၏ အာဏာ ဆက်လက်ထိန်းချုပ်နိုင်ရေး ကြိုးပမ်းမှုအပြင် မည်သည့်ကြိုးပမ်းချက်ကိုမဆို ဆက်လက်ကန့်ကွက် ရှုတ်ချကြောင်း အပါအဝင် တောင်းဆို၊ တိုက်တွန်းချက် ရှစ်ချက် ကိုလည်း ထုတ်ပြန်ချက်၌ ဖော်ပြထားသည်။
