မြန်မာနိုင်င့အတွင်း အကြမ်းဖက်မှုအားလုံး ချက်ချင်း အဆုံးသတ်ရန်နှင့် ပဋိပက္ခများ ရပ်တန့်ရန်၊ တင်းမာမှုများ ဖြေလျှော့ရန်နှင့် မတရားဖမ်းဆီးထိန်းသိမ်းထားသူများအားလုံးအား ပြန်လွှတ်ပေးရန် တိုက်တွန်းထားသည့် ကုလသမဂ္ဂ လုံခြုံရေးကောင်စီ ဆုံးဖြတ်ချက် ၂၆၆၉ (၂၀၂၂) အား အကောင်အထည်ဖော်ရန် နိုင်ငံပေါင်း ၁၀ ခုက ထပ်မံတိုက်တွန်းထားသည်။
ဥရောပသမဂ္ဂကိုယ်စား အဆင့်မြင့် ကိုယ်စားလှယ်၊ အမေရိကန်၊ သြစတြေးလျ၊ ကနေဒါ၊ နယူးဇီလန်၊ နော်ဝေ၊ ကိုရီးယားသမ္မတနိုင်ငံ၊ ဆွစ်ဇာလန်၊ တီမောနှင့် ယူနိုက်တက်ကင်းဒမ်း အစိုးရများက မြန်မာနိုင်ငံအတွင်း လူ့အခွင့်အရေးနှင့် လူသားချင်းစာနာထောက်ထားမှုဆိုင်ရာ အကျပ်အတည်းကို အဖြေရှာရေးအတွက် ဇန်နဝါရီ ၆ ရက်တွင် ပူးတွဲထုတ်ပြန် တိုက်တွန်းထားခြင်း ဖြစ်သည်။
တိုက်တွန်းကြေညာချက်၌ အာဏာရှင်အဖွဲ့အစည်းက မြန်မာပြည်သူများအပေါ် ဆက်လက် အကြမ်းဖက်ခြင်းဖြင့် ဖိနှိပ်နေမှုအား လက်ခံနိုင်စရာမရှိကြောင်း၊ ပဋိပက္ခများကြောင့် လူပေါင်း ၃ ဒသမ ၅ သန်းကျော် နေရပ်စွန့်ခွာနေရကာ ၁၅သန်းကျော်မှာ စားနပ်ရိက္ခာပြတ်လပ်မှုနှင့် ရင်ဆိုင်နေရကြောင်း၊ ရိုဟင်ဂျာများ ရင်ဆိုင်နေရသည့် ခွဲခြားဆက်ဆံခံရခြင်းနှင့် ရက်စက်ကြမ်းကြုတ်သည့် အပြုအမူများကို ဖြေရှင်းရေးကို နိုင်ငံ့အကျပ်အတည်းအား နိုင်ငံရေးနည်းဖြင့် အဖြေရှာရာ၌ အစိတ်အပိုင်းတစ်ခုအဖြစ် ပါဝင်ရမည် ဖြစ်ကြောင်း၊ ဘုံသဘောတူညီချက် ငါးရပ်ကို အကောင်အထည် ဖော်နေသည့် အာဆီယံ၏အခန်းကဏ္ဍကို အပြည့်အဝထောက်ခံကာ ကုလအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ်၏ အခန်းကဏ္ဍကိုလည်း အသိအမှတ်ပြုကြောင်း ပါရှိသည်။