Kachin Political Interim Coordination Team
၂၀၂၁ ခုနှစ်၊ မတ်လ ၉-၁၁ တွင် ကျင်းပခဲ့သော ပြည်တွင်း၊ ပြည်ပရှိ ကချင်အဖွဲ့အစည်း (၅) ခု၏ အစည်းအဝေး တွင် ကချင်အမျိုးသားများကိုယ်စား ကြားကာလ နိုင်ငံရေးဆိုင်ရာလုပ်ငန်းများကို တာ၀န်ယူညှိနှိုင်းဆောင်ရွက်ရန်အတွက် Kachin Political Interim Coordination Team (KPICT) ကိုဖွဲ့စည်း ခဲ့သည်။
အဓိကရည်ရွယ်ချက်မှာ ကချင် အမျိုးသားများရဲ့ နိုင်ငံရေးရည်မှန်းချက်တွေကို တာဝန်ယူ ညှိနှိုင်းဆောင်ရွက်ရန် ဖြစ်သည်။ ပေါင်းစပ်ဖွဲ့စည်းမှုတွင် စုံလင်စွာ ပါဝင်ရေး ရည်ရွယ်ချက်ဖြင့် KPICT ကိုအဖွဲ့ဝင် အသင်းအဖွဲ့ငါးဖွဲ့က ကိုယ်စားလှယ်သုံးဦးစီနဲ့ ၁၅ ဦး ကော်မတီဖွဲ့စည်းခဲ့သည်။ KPICT ၏ ပင်မ ဦးတည်ချက်ပန်းတိုင်များမှာ လက်ရှိမြန်မာနိုင်ငံအတွင်း ဖြစ်ပေါ်နေသော နိုင်ငံရေးအခင်းအကျင်းပေါ်တွင်အခြေခံ၍၊ အချုပ်အခြာအာဏာသည် ပြည်သူထံမှ ဆင်းသက်သည်ဖြစ်ကြောင်းခိုင်မာစေရန်၊ အာဏာရှင်စနစ်ကိုအပြီးတိုင်တိုက်ဖျက်ပြီး စစ်မှန်သော ဖက်ဒရယ်ဒီမိုကရေစီပြည်ထောင်စုတည်ဆောက်ရန်နှင့် နိုင်ငံရေးရည်မှန်းချက်တူညီသော ပြည်တွင်း၊ ပြည်ပအဖွဲ့အစည်းများနှင့် ပူးပေါင်းလက်တွဲဆောင်ရွက်သွားရန် ဖြစ်သည်။
KPICT သည် ပြည်ထောင်စုလွှတ်တော်ကိုယ်စားပြုကော်မတီ (CRPH) နှင့် ကြားကာလ ကချင်အစိုးရဖွဲ့စည်းရေး သဘောတူစာချုပ်ကို ၂၀၂၁ ခုနှစ်၊ မေလ (၂၇) ရက်နေ့တွင် ပြုလုပ်ခဲ့သည်။
KPICT သည် အမျိုးသားညီညွတ်ရေးအစိုးရ (NUG) သို့ ဒုသမ္မတတဦးနှင့် ဝန်ကြီး၊ ဒုဝန်ကြီးများ အဆိုပြု အမည်စာရင်းပေးပို့ပါဝင်ခဲ့သည်။ အမျိုးသားညီညွတ်ရေး အတိုင်ပင်ခံကောင်စီတွင် ပါဝင်ခဲ့သော်လည်း ၂၀၂၂ ခုနှစ်အတွင်းပါဝင်မှုမှ ရပ်နားခဲ့သည်။
KPICT ၏ အတွင်းရေးမှူးမှာ Salang Nsang Gum San ဖြစ်ပါသည်။
ဆက်စပ်ဖြစ်စဉ်များ
အသွင်ကူးပြောင်းရေး ဖွဲ့စည်းပုံအခြေခံဥပဒေဆိုင်ရာ အစီအမံ (Arrangement for Transitional Constitution – AFTA) မိတ်ဆက်
နွေဦးတော်လှန်ရေးတွင် “စစ်အာဏာရှင်စနစ် ချုပ်ငြိမ်းရေးနှင့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး” ကို ကြွေးကြော်လာခဲ့သည်နှင့်အမျှ ဖွဲ့စည်းပုံအခြေခံဥပဒေဆိုင်ရာ ဆွေးနွေးမှုများမှာလည်း ၂၀၂၁ ခုနှစ်၊ ဖေဖော်ဝါရီလကတည်းကပင် ရှိခဲ့ကြသည်။ စစ်အာဏာရှင်လက်ထက် အငြင်းပွားဖွယ် အတည်ပြု ပြဌာန်းခဲ့သည့် ၂၀၀၈ ဖွဲ့စည်းပုံ အခြေခံဥပဒေကို တော်လှန်ရေးအင်အားစုများက လက်မခံပဲ ဆန့်ကျင်ခဲ့ကြသလို၊ တော်လှန်ရေးအဖွဲ့အစည်းများကလည်း အဆိုပါ အခြေခံဥပဒေသည် ပျက်ပြယ်ပြီးဖြစ်ကြောင်း ထုတ်ပြန်ခဲ့ကြပြီး ဖြစ်သည်။ တော်လှန်ရေးကာလတွင် ဖွဲ့စည်းပုံအခြေခံဥပဒေ မူဘောင်တရပ်အဖြစ် ဖက်ဒရယ်ဒီမိုကရေစီ ပဋိညာဉ်အစိတ်အပိုင်း (၁) နှင့် (၂) ကို ထုတ်ပြန် ကျင့်သုံးခဲ့ကြသည်။ အဆိုပါ ပဋိညာဉ်တွင်လည်း လမ်းပြမြေပုံများ ချမှတ်ခဲ့ရာတွင် တော်လှန်ရေးအလွန် အသွင်ကူးပြောင်းရေးကာလ ဖွဲ့စည်းပုံအခြေခံဥပဒေတရပ်ကို တော်လှန်ရေးကာလအတွင်းထဲမှာပင် ရေးဆွဲရန်လည်း လမ်းပြမြေပုံအဆင့်တခုအဖြစ် အပါအဝင် ဖြစ်ခဲ့သည်။
ပသုံးလုံး၊ ပြည်သူ့စစ်မှုထမ်းနှင့် ၁၉၈၂ နိုင်ငံသားဥပဒေဆိုင်ရာ ဆုံးဖြတ်ချက်သုံးရပ်အား ဒုတိယအကြိမ် ပြည်သူ့ညီလာခံ၌ အတည်ပြုနိုင်ခဲ့
အမျိုးသားညီညွတ်ရေးအတိုင်ပင်ခံကောင်စီ (NUCC) ဦးဆောင်၍ ဧပြီ ၄ ရက်မှ ၉ ရက်အတွင်း ငါးရက်တာ ပြုလုပ်သည့် ဒုတိယအကြိမ် ပြည်သူ့ညီလာခံ၌ ဒေသန္တရအုပ်ချုပ်ရေးနှင့် တရားဥပဒေစိုးမိုးရေး၊အကြမ်းဖက်စစ်တပ်၏ တရားမဝင် ပြည်သူ့စစ်မှုထမ်းဥပဒေကိစ္စ၊ မြန်မာနိုင်ငံသားဥပဒေ (၁၉၈၂) နှင့်ပတ်သက်သည့် ဆုံးဖြတ်ချက်သုံးရပ်အား အတည်ပြု ဆုံးဖြတ်နိုင်ခဲ့ကြောင်း NUCC က ထုတ်ပြန်လိုက်သည်။
NUG နှင့် KPICT တော်လှန်ရေးကာလ ကဏ္ဍပေါင်းစုံအားကောင်းရေး တွေ့ဆုံ
နွေဦးတော်လှန်ရေးကာလ စစ်ရေး၊ နိုင်ငံရေး၊ နိုင်ငံခြားရေးနှင့် ဝန်ဆောင်မှု လုပ်ငန်းများအား ပြန်လည်သုံးသပ်ခြင်းနှင့် ပူးပေါင်းဆောင်ရွက်နေသည့် ကဏ္ဍများ ပိုမိုအားကောင်းရေး၊ တော်လှန်ရေး အောင်မြင်ရေးအတွက် လက်တွဲလုပ်ဆောင်မည့် ရှေ့လုပ်ငန်းစဉ်များအတွက် အမျိုးသားညီညွတ်ရေးအစိုးရ (NUG)၊ မဟာမိတ်ဆက်ဆံရေးကော်မတီနှင့် Kachin Political Interim Coordination Team (KPICT) တို့ နိုဝင်ဘာ ၃၀ ရက်က တွေ့ဆုံခဲ့သည်။