အနာဂတ် ဖက်ဒရယ်ပြည်ထောင်စု တည်ဆောက်ရေးတွင် အမျိုးသမီး ခေါင်းဆောင်မှု အနည်းဆုံး ၃၀ ရာခိုင်နှုန်းအထိ ပါဝင်လာရေး ကြိုးပမ်းဆောင်ရွက်သွားရန် လမ်းညွှန်ချက်အဖြစ် ညီလာခံက အတည်ပြုခဲ့ကြောင်း တအာင်းအမျိုးသမီးအဖွဲ့အစည်း (Ta’ang Women’s Organization - TWO) က ကြေညာလိုက်သည်။

TWO ၏ ၁၀ ကြိမ်မြောက် ညီလာခံနှင့် အလုပ်အမှုဆောင်အစည်းအဝေးအား ဇန်နဝါရီ ၂၇ မှ ၃၁ ရက်အထိ စုစုပေါင်း ၉၂ ဦးဖြင့်ပြုလုပ်ပြီးနောက် ထိုသို့လမ်းညွှန်ချက် ချမှတ်ကြောင်း စာအမှတ် (၀၁/၂၀၂၅) ဖြင့် ဖေဖော်ဝါရီ ၃ ရက်တွင် ထုတ်ပြန်ကြေညာခြင်း ဖြစ်သည်။ TWO သည် ငြိမ်းချမ်းရေး၊ ကျား-မ တန်းတူရေး၊ တရားမျှတရေး၊ အာဏာရှင်စနစ် အပြီးသတ်ချုပ်ငြိမ်းရေး၊ တိုင်းရင်းသားတန်းတူရေး၊ ကိုယ်ပိုင်ပြဋ္ဌာန်းခွင့်ရရှိရေးကို တစိုက်မတ်မတ် ကြိုးပမ်းဆောင်ရွက်သွားရန် ညီလာခံက လမ်းညွှန်အတည်ပြုထားသည်။ ထို့ပြင် တအာင်းပြည်တော်လှန်ရေးကာလအစိုးရ ဖွဲ့စည်းရေးကို ကြိုဆိုကာ ကဏ္ဍတိုင်း၌ အမျိုးသမီးကိုယ်စားပြု ပါဝင်မှုကို ထည့်သွင်းသွားရန်လည်း တိုက်တွန်းထားသည်။