၁၀:၂၇ စစ်ဆင်ရေး၌ သိမ်းပိုက်ထားသည့် မြို့ပေါင်း ၁၂ မြို့အပါအဝင် တအာင်းတပ်မတော် အခြေစိုက်သည့် နယ်မြေဒေသများ လုံခြုံရေး၊ တရားဥပဒေ စိုးမိုးရေး၊ ပညာရေး၊ ကျန်းမာရေးနှင့် လူမှုဘဝဖွံ့ဖြိုးတိုးတက်ရေး ကိစ္စများအား တာဝန်ခံမှုရှိစွာ ဦးဆောင်စီမံအုပ်ချုပ်ရေးအတွက် ဒေသခံပြည်သူများ ပါဝင်နိုင်မည့် လူထုအစိုးရ အမြန်ဆုံး ပေါ်ပေါက်အောင်ဆောင်ရွက်မည်ဟု ပလောင်ပြည်နယ်လွတ်မြောက်ရေးတပ်ဦး (PSLF/TNLA) က ဇန်နဝါရီ ၁၀ ရက်တွင် ထုတ်ပြန်လိုက်သည်။

PSLF နှစ်ပတ်လည်ညီလာခံအား ဇန်နဝါရီ ၃ ရက်မှ ၇ ရက်အထိ ဗဟိုကော်မတီ၊ အရံဗဟိုကော်မတီ၊ လုပ်ငန်းဌာနမှူး၊ တပ်မှူး၊ ခရိုင်မှူးနှင့် ဖိတ်ကြားထားသူ စုစုပေါင်း ၁၇၃ ဦးဖြင့် ပြုလုပ်ပြီးနောက် မြန်မာ၊ တအာင်း၊ အင်္ဂလိပ်၊ တရုတ် လေးဘာသာဖြင့် ထုတ်ပြန်လိုက်ခြင်းဖြစ်သည်။

ထုတ်ပြန်ချက်၌ တအာင်းတပ်မတော်အား တပ်မဟာ (၉) ခုအထိ တိုးချဲ့ပြင်ဆင်ကာ အုပ်ချုပ်ရေးလုပ်ငန်းများအတွက် မြို့ (၁၈) မြို့ ပါဝင်သည့် ခရိုင် (၅) ခုကိုလည်း ပြင်ဆင်စုဖွဲ့ရန် သဘောတူညီခဲ့ကြောင်း၊ လက်ရှိတွင် ဘုံရန်သူဖြစ်သည့် နစက မြန်မာစစ်ကောင်စီသည် သမိုင်းတွင်သည့် ကျဆုံးမှုနှင့် ဆက်တိုက်ကြုံတွေ့နေရကာ တိုင်းရင်းသားလက်နက်ကိုင်အင်အားစုများ၊ နွေဦးတော်လှန်ရေးအင်အားစုများ အားလုံးအနေဖြင့်စုပေါင်းရုန်းကန်၍ တော်လှန်ရေးအရှိန် အမြင့်ဆုံးလွှင့်တင်ရမည့် အချိန်အခါဟု ရှုမြင်သုံးသပ်ကြောင်းလည်း ပါရှိသည်။

PLSF/TNLA သည် ၁၀:၂၇ စစ်ဆင်ရေးအတွင်း မိုင်းလုံ၊ နမ့်ဆန်၊ နမ့်ခမ်း၊ မန်တုံ၊ နမ္မတူ၊ မိုင်းငေါ့၊ ကွတ်ခိုင်၊ နောင်ချို၊ မိုးကုတ်၊ မိုးမိတ်၊ ကျောက်မဲနှင့် သီပေါမြို့တို့အား တိုက်ခိုက်သိမ်းပိုက်ထားသည်။