တီးတိန်မြို့နယ်တွင် ကြားကာလ ချင်းအတိုင်ပင်ခံကောင်စီ (ICNCC) နှင့် ချင်းညီနောင် (CB) ဦးဆောင်မှုဖြင့် မြို့သိမ်းတိုက်ပွဲစစ်ဆင်ရေးလုပ်ဆောင်ရန် အပြင်းအထန် လုပ်ဆောင်နေချိန်ဖြစ်၍ ချင်းအမျိုးသားတပ်ဦး (CNF) နှင့် အခြားသော ချင်းပြည်ကောင်စီ (Chinland Council) အဖွဲ့ဝင်များက စစ်ရေးလှုပ်ရှားမှုများအား အမြန်ဆုံး ပြန်လည်ရုပ်သိမ်းရန် တီးတိန်မြို့နယ် ၂၀၂၀ ရွေးကောက်ခံ လွှတ်တော်ကိုယ်စားလှယ်များက ဇန်နဝါရီ ၁၇ ရက်တွင် ထုတ်ပြန်လိုက်သည်။

မိမိတို့သည် ၂၀၂၀ ရွေးကောက်ပွဲ၌ တီးတိန်မြို့နယ် ပြည်သူများ၏ ရွေးချယ်တင်မြှောက်ခြင်းခံရကာ စစ်တပ်အာဏာသိမ်းစဉ်ကတည်းက ပြည်သူနှင့်အတူ မည်သည့်အာဏာရှင်ကိုမဆို ဆန့်ကျင်တော်လှန်မည့်ရွေးကောက်ခံ လွှတ်တော်ကိုယ်စားလှယ်များဖြစ်ကြောင်း ထုတ်ပြန်ချက်အား စတင်ထားသည်။

CB ဦးဆောင်မှုဖြင့် မြို့သိမ်းစစ်ဆင်ရေးလုပ်ဆောင်ရန် အပြင်းအထန်ပြင်ဆင်နေသည့်ကာလတွင် CNF နှင့် People Defense Army (PDA) ၊ CC အဖွဲ့ဝင်များက နိုင်ငံရေးအရ လက်ဦးမှုယူကာ အနှောင့်အယှက်ပေးမှုများ ပြုလုပ်နေကြောင်း၊ ယင်းလုပ်ရပ်များ ခပ်စိပ်စိပ် ဖြစ်ပေါ်လာခြင်း အကျိုးဆက်ကြောင့် ဒေသတွင်း ချင်းလူမျိုးနှင့် ချင်းတော်လှန်ရေးလက်နက်ကိုင် အချင်းချင်းအကြား ပစ်ခတ်တိုက်ခိုက်မှုများ ဖြစ်ပွားလာနိုင်သည့်အတွက် သတိပေးထုတ်ပြန်ခြင်း ဖြစ်ကြောင်းထုတ်ပြန်ချက်၌ ဖော်ပြထားသည်။