အကြမ်းဖက်စစ်အုပ်စု၏ ပြည်သူကို ရန်သူအဖြစ် ပစ်မှတ်ထားတိုက်ခိုက်ရေးမူဝါဒကြောင့် နွေဦးတော်လှန်ရေး သုံးနှစ်တာကျော်ကာလအတွင်း စစ်ကိုင်းတိုင်း လူဦးရေ၏ ၂၂ ဒသမ ၄ ရာခိုင်နှုန်းခန့်မှာ စစ်ရှောင်အဖြစ် နေထိုင်နေရကာ နေအိမ်ပေါင်း ၅၃,၀၀၀ ကျော် မီးရှို့ခံထားရကြောင်း ဇူလိုင် ၁၁ ရက်က စစ်ကိုင်းဖိုရမ်ဖြစ်မြောက်ရေးအဖွဲ့ - “စစ်ကိုင်းပြည်သူဖေးမကူ ကွန်ရက်"၏ တစ်နှစ်ပြည့် ထုတ်ပြန်ကြေညာချက်၌ ဖော်ပြထားသည်။
ကွန်ရက်သည် စစ်ဘေးရှောင်များအား အရေးပေါ်စစ်ရှောင်၊ ယာယီစစ်ရှောင်နှင့် ရေရှည်စစ်ရှောင်ဟူ၍ အမျိုးအစားခွဲ၍ ကူညီမှုများ ပြုလုပ်ပေးနေကာ အကြမ်းဖက်စစ်အုပ်စု၏တားမြစ်၊ ဖမ်းဆီးမှုများအပြင် တော်လှန်ဘက်သားချင်း နိုင်ငံရေးခံယူချက် ကွဲပြားမှု အခြေခံမှ ရှုမြင်ပုံဖော်ကာ ဟန့်တား၊ ပိတ်ပင်မှုများလည်းရင်ဆိုင်နေရကြောင်းလည်း ထုတ်ပြန်ချက်၌ ပါရှိသည်။
၂၀၂၃ ခုနှစ် ဇူလိုင် ၁၁ ရက်တွင် ကွန်ရက်အား တိုင်းအတွင်းရှိ စစ်ရှောင် ကူညီကယ်ဆယ်ရေးအဖွဲ့ ၂၇ ဖွဲ့နှင့် တွေ့ဆုံဆွေးနွေးကာ မူဝါဒချ၍ ဖွဲ့စည်းခဲ့ခြင်းဖြစ်ကာ အမျိုးသားညီညွတ်ရေးအစိုးရ (NUG) နှင့်လည်းချိတ်ဆက်ဆောင်ရွက်မည်ဟု ကြေညာထားသည်။
